حضرت سلیمان علیہ السلام

حضرت سلیمان علیہ السلام بہت ہی بلند مرتبہ پیغمبرِ خدا گذرے ہیں، کائنات کی کل مخلوق پر آپ کو مکمل اختیار حاصل تھا، آپ حضرت داؤد علیہ السلام کے صاحبزادے تھے، آپ کی حکومت میں جن اور انسان، ہوا، پانی، غرضیکہ اللہ کے حکم سے سبھی جاندار آپ کے فرمانبردار تھے، بیت المقدس آپ ہی نے تعمیر کروایا تھا، جب آپ دربار عام فرماتے تھے تو انسانوں کے علامہ جنات اور پریوں کا بھی ہجوم ہوتا تھا اور اس دربارِ عام کے اوپر پرندے اپنے پروں سے سایہ کئے رہتے تھے اور آپ کے اشارے کے منتظر رہتے تھے، تاکہ حکم کی تعمیل جلد ہوسکے، اللہ اس برگزیدہ پیغمبر کے ارشادات پیش خدمت ہیں:

(اقوال کاخزانہ)

(۱)          ہوشیار انسان بلا کو پیش بینی سے دیکھتا ہے اور اپنے آپ کو بچالیتا ہے، مگر نادان لوگ خود ہی اس بلا میں گرفتار ہوجاتے ہیں۔

(۲)         جب تیری آنکھیں بیگانہ آنکھوں سے لریں گی اور تیرا دل اس کے غلط مطالب نکالے گا تو تیرا انجام بُرا ہی ہوگا۔

(۳)         سخن جو موقع پر کیا جائے سونے کے سیبوں کے مانند ہے، جو رَو پہلی ٹوکریوں میں ہوں۔

(۴)         کج رَو آدمی اپنی راہ میں خود کانٹے اور پھندے بچھادیتا ہے، جبکہ جو آدمی اپنی اصلاح خود کرتا ہے اس کی راہ سے کانٹے اور پھندے دو بھاگتے ہیں۔

(۵)         بیوقوف آدمی کے کانوں میں عقل کی باتیں مت ڈال، کیونکہ وہ عمل کے بجائے تیرے کلام کا مذاق اُڑائے گا۔

(۶)         اے کاہل آدمی! چیونٹی کے پاس جا! اس کی عادت دیکھ اور عقل حاصل کر کہ وہ اس کا کوئی سردار اور حاکم نہیں پھر بھی وہ گرمیوں میں خوراک اکھٹا کرتی ہے اور سردیوں میں اس سے فائدہ اٹھاتی ہے۔

(۷)         دغا کی روٹی آدمی کو میٹھی لگتی ہے، مگر بالآخر اس کا منہ کنکریوں سے بھراتا ہے۔

(۸)         ٹھٹھا کرنے والے کو سمجھانا ضروری نہیں، کیونکہ وہ تجھ سے بغض رکھنا شروع کردے گا، جبکہ دانشمند کو سمجھانے سے وہ تجھے اچھا سمجھے گا۔

(۹)         کلام کی کثرت میں کچھ نہ کچھ گناہ ضرور ہے، مگر جو شخص اپنے لبوں کو روکے رکھتا ہے وہ بڑا دانا ہوتا ہے۔

(۱۰)        وہ جو عالم ہے باتیں کم کرتا ہے، سرد مزاج اور خردمند ہے اور احمق بھی اگر خاموش بیٹھا رہے تو عقلمند ہی لگے گا۔

(۱۱)         آدمی کی  عزت اس میں ہے کہ جھگڑے سے بچتا رہتا ہے، مگر بے وقوف اس کو تنگ کرتے رہتے ہیں۔

(۱۲)        جھگڑا صرف مغروری ہی سے ہوتا ہے، مگر عقل ان کے ساتھ ہے جو مصلحت کو پسند کرتے ہیں۔

(۱۳)        وہ شخص جو گناہوں کو چھپاتا ہے کامیاب نہ ہوگا، مگر جو گناہ کا اقرار کرتا ہے اور توبہ کرتا ہے رحمت کاصرف وہی حقدار ہے۔

(۱۴)        نیکی قوم کو اعلیٰ بنادیتی، جبکہ گناہ قوم کو ذلیل کردیتا ہے۔

(۱۵)        ان قدیم اخلاقی حدود کو جو تمہارے آباء و اجداد نے قائم کی ہیں ختم مت کرو۔

(۱۶)        اپنے ہمسایہ پر بدی کا منصوبہ مت بنا جبکہ وہ تیرے پڑوس میں بے فکر رہ رہا ہے۔

(۱۷)        اپنے ہمسایہ کے گھر جانے سے باز رہ، ایسا نہ ہو کہ تیرے روز روز کے آنے جانے سے بُرا خیال کرے۔

(۱۸)        جب تیرا ہمسایہ تجھ سے کچھ طلب کرے اور تو دینے کے قابل بھی ہو تو ہرگز نہ کہہ کہ: ابھی تو جا پھر آنا تب تجھے دے دوں گا۔

(۱۹)        اپنے آپ کو عقلمند تصور مت کرو، اللہ سے ڈرو اور برائیوں سے باز رہو۔

(۲۰)       بیوقوف کو اس کی حماقت کی مانند جواب نہ دو، ایسا نہ ہو کہ تم بھی اس جیسے ہوجاؤ۔

(۲۱)        وہ جو بیوقوف کے ہاتھ پیغام بھیجتا ہے گویا اپنے پاؤں خود ہی کاٹتا ہے۔

(۲۲)       جو شخص غریبوں پر ظلم کرتا ہے اپنے خالق کی حقارت کرتا ہے۔

(۲۳)       خداوند عالم ان چیزوں کو برا سمجھتا ہے: اونچی آنکھیں، جھوٹی زبان، وہ ہاتھ جو بے گناہ پر ظلم کرے، وہ دل جو برے منصوبے بنائے، وہ پاؤں جو جلدی برائی کی طرف جائیں، وہ گواہ جو جھوٹ بولے اور وہ شخص جو بھائیوں کو آپس میں لڑوا دے۔

(۲۴)       جس کو غصہ دیر میں آتا ہے بہت ہی عقلمند ہے اور جو جلد غصہ ظاہر کرتا ہے وہ اپنی کم عقلی اور بے وقوفی ظاہر کرتا ہے۔

(۲۵)       گھر اور مال وہ میراث ہے جو باپ سے حاصل ہوتی ہے، مگر عقلمند بیوی نعمتِ خداوندی ہے۔

(۲۶)       رعایا کی خوشحالی سے بادشاہ کی رونق ہے، اور رعایا کی مفلسی سے بادشاہ کی تباہی ہے۔

(۲۷)       ایک خوش مزاج آدمی پژمردہ دلوں کی دوا ہے۔

(۲۸)       جاہل اپنے دل کی ہر بات کو ظاہر کردیتا ہے، مگر عقلمند آخر موقع تک چھپائے رکھتا ہے۔

(۲۹)        جہالت لڑکے کے دل سے وابستہ ہے، مگر بہتر تربیت کی چھڑی اسے اس سے دور کردے گی۔

(۳۰)       راستی اور انصاف خداوند کے نزدیک قربانی کرنے سے زیادہ پسندیدہ ہے۔

(۳۱)        لڑکے کی تادیب سے دست بردار نہ ہو، چھڑی مارنے سے وہ مر نہ جائے گا، مگر جہنم سے اس کی جان بچالے گا۔

(۳۲)       قناعت بدن کو تازگی بخشتی ہے اور حسد بدن گلا دیتا ہے۔

(۳۳)       کسی شخص کی بہترین مالیت یہ ہوسکتی ہے کہ وہ مکمل تعلیم یافتہ ہو۔

(۳۴)       ہوسکتا ہے کہ کوئی دولت تمہیں اچانک مل جائے مگر اس کا انجام اچھا نہ ہو۔

(۳۵)       تعلیم بہترین خیرات ہے۔

(۳۶)       سچا گواہ آدمی کو برائی سے بچاتا ہے اور جھوٹے گواہ سے خداوند کریم نفرت کرتا ہے۔

(۳۷)       ہر ایک محنت میں فائدہ ہے، مگر زبانی جمع خرچ سے مفلسی آتی ہے۔

(۳۸)       بہترین تعلیم سب سے اچھا جہیز ہے۔

(۳۹)       جھگڑے کو چھوڑ دو قبل اس کے کہ بڑھ جائے۔

(۴۰)       کوئی آدمی شرارت سے مضبوط نہیں ہوسکتا، مگر صادقوں کی بنیاد کو کبھی آنچ نہیں آتی۔

(۴۱)        شریر کی بدکاریوں سے اس کی پکڑ ہوگی اور وہ اپنے ہی گناہوں کی زنجیروں میں جکڑا جائے گا۔

(۴۲)       وہ شخص جس کے دل میں بُرائی ہے فلاح نہ پائے گا اور جس کو نکتہ چینی کی عادتِ بد لاحق ہوگی بالآخر تباہ ہوگا۔

(۴۳)       ہر ایک انسان اپنے سب اعمال کو صحیح سمجھتا ہے، مگر خداوند عالم دل کو تولتا ہے۔

(۴۴)       خداوند کا خوف انسان کو طویل عمر دیتا ہے، مگر نافرمانوں کی عمر گھٹ جاتی ہے۔

(۴۵)       شکستہ خاطر کے سب دن بُرے ہیں، مگر جو خوش مزاج ہے وہ ہمیشہ جشن کرتا ہے۔

(۴۶)       ملائم جواب سے غصہ زائل ہوجاتا ہے، مگر کرختگی غضب ڈھاتی ہے۔

(۴۷)       بیوقوف اپنے باھ کی نصیحت کو حقارت سے دیکھتا ہے، مگر جو نصیحت سنتا ہے اور غور کرتا ہے عقلمند ہوجاتا ہے۔

(۴۸)       سچا آدمی سات بار گر کر بھی سنبھل جاتا ہے، مگر شریر مصیبت میں جب ایک مرتبہ گرفتار ہوتا ہے تو پھر سنبھل نہیں سکتا۔